علقت الإعلامية مروة صبري، على الصورة التي نشرتها الفنانة عارفة عبد الرسول، عبر صفحتها الشخصية بفيس بوك، مرتدية بنطلونا وعلقت قائلة: "نسيت زرار البنطلون".
وقالت مروة صبري خلال برنامجها "قعدة ستات" المذاع على شاشة "القاهرة اليوم": الموضوع بقى غريب أوي وبقى مخيف، يقولك أصل أنا مش عايز تريند، حضرتك بشكلك وقيمتك عملتي كده ليه صورة زي دي Funny لأ مضحكش، مع احترامي لكل الناس والمليون كومنت اللي دخل يقولها انتي لذيذة وجميلة، لأ أنا آسفة يا أستاذة عارفة الصورة دي مضحكش.
وتابعت مروة صبري: الصورة دي لا تليق بـ عارفة عبد الرسول، حضرتك فنانة جميلة وعظيمة متتصوريش صورة زي دي، وكان في صورة على البحر وعادي هي حرة، وفي ناس قالت إنها ناسية، إزاي ياجماعة؟ هي منزلة الصورة وكاتبة، الفنانة عارفة عبد الرسول جدة، أحفادها يقولوا إيه أو يتصوروا إزاي.
واستكملت مروة صبري: تخيلوا لو فنانة صغيرة في السن وعملت التصرف ده مكنش حد كان هيعديهلها والسوشيال ميديا كانت هتتقلب وهتعيش تريند والناس تطلعها على المسرح، تعددت الأسباب والتريند واحد.
برنامج "قعدة ستات" تقدمه الإعلامية مروة صبري على شاشة "القاهرة اليوم" يوم السبت من كل أسبوع، وتستضيف من خلاله عددًا من الفنانات وتناقش قضايا مختلفة.
